Malayalam lyrics

ഞാനറിയാതെന്‍ കരള്‍ കവര്‍ന്നോടിയ
പ്രാണനും പ്രാണനാം പെണ്‍കിടാവേ-എന്റെ
പ്രാണനും പ്രാണനാം പെണ്‍കിടാവേ
നിന്നെത്തിരയുമെന്‍ ദൂതനാം കാറ്റിനോ-
ടെന്തേ നിന്‍ ഗന്ധമെന്നോതിടേണ്ടൂ?

(ഞാനറിയാതെന്‍ )

വേനല്‍മഴചാറി വേര്‍പ്പ് പൊടിയുന്നോ-
രീ നല്ല മണ്ണിന്‍ സുഗന്ധമെന്നോ?
രാവില്‍ നിലാമുല്ല പോലെന്‍ തൊടിയിലെ
മാവു പൂക്കും മദഗന്ധമെന്നോ?
മുടിയിലെ എള്ളെണ്ണക്കുളുര്‍മണമോ?
ചൊടിയിലെ ഏലത്തരിമണമോ?

(ഞാനറിയാതെന്‍ )

വാടിയതാഴംപൂ വാസന പൂശിയ
കോടിപ്പുടവതന്‍ പുതുമണമോ?
നിന്‍ മടിക്കുത്തിലായ് വാരിനിറച്ചൊരു
പൊന്നിലഞ്ഞിപ്പൂവിന്‍ മൃദുഗന്ധമോ?
മുടിയിലെ കുടമുല്ലപ്പൂമണമോ?
ചൊടിയിലെ കദളിത്തേന്‍മണമോ?

(ഞാനറിയാതെന്‍ )

Song information

Music: ഉമ്പായി

Lyricist: ഒ എൻ വി കുറുപ്പ്

Singer: ഉമ്പായി

Film/album: പാടുക സൈഗാള്‍ പാടൂ

Explore this song