Roman script
in aankhon ne kya kya tamaasha na dekha
haqeeqat mein jo dekhana tha na dekha
tujhe dekh kar vo duyi uth gaee hai
ki apana bhee saani na dekha na dekha
un aankhon ke qurbaan jaoon jinhon ne
hazaaron hijaabon mein paravaana dekha
na himmat na qismat na dil hai na aankhen
na dhoonda na paaya na samajha na dekha
mareezaan-e-ulfat kee kya bekasi hai
maseeha ko bhee chaara-farama na dekha
bahut dard-mandon ko dekha hai too ne
ye seena ye dil ye kaleja na dekha
vo kab dekh sakata hai us kee tajalle
jis insaan ne apana hee jalva na dekha
bahut shor sunate the is anjuman ka
yahaan aa ke jo kuchh suna tha na dekha
safaee hai baag-e-mohabbat mein aisee
ki baad-e-saba ne bhee tinaka na dekha
use dekh kar aur ko phir jo dekhe
koee dekhane vaala aisa na dekha
vo tha jalva-aara magar too ne moosa
na dekha na dekha na dekha na dekha
gaya kaaravaan chhod kar mujh ko tanha
zara mere aane ka rasta na dekha
kahaan naqsh-e-avval kahaan naqsh-e-saani
khuda kee khudai mein tujh sa na dekha
teree yaad hai ya hai tera tasavvur
kabhidaag ko ham ne tanha na dekha