Malayalam lyrics

കതിർമണികൾ തേടി വരും കണ്മണിക്കുരുവികളെ
കണ്ടുവോ നിങ്ങൾ കണ്ടുവോ
കടലലകൾ തഴുകുമീ പുണ്യഭൂമി സഹ്യ
ഗിരിനിരകൾ കാക്കുമീ ഹരിതഭൂമി
മാമാങ്കമരങ്ങേറിയ നാവാമണല്‍പ്പുറത്ത്
ഭാരതപ്പുഴ തിരുവാതിരയാടുമ്പോൾ
കാശ്മീരധൂളി ചാർത്തിയ കാലടികൾ ചുംബിച്ച
കാലടി സൗന്ദര്യലഹരി പാടും

ശബരീശ്വരസന്നിധിയിൽ
പാവനിയാം പമ്പാനദി
ശരണം വിളി കേട്ടുണർന്നു പാടുന്നു
കൽക്കുരിശുകൾ ചൂടുന്ന കുന്നുകൾ താഴ്വരകൾ
കർത്താവിൻ തിരുനാമം വാഴ്ത്തുന്നു

ആരാരും കാണാത്തൊരാലക്തിക ശക്തി തൻ
തേരോടി വരുന്ന നൂല്‍പ്പാലമിതാ
ആരിയൻ നെൽക്കതിർപ്പാടങ്ങൾ ഭൂമിയ്ക്ക്
സൂര്യപടം നെയ്യുന്ന ശാലയിതാ
ശാസ്ത്രത്തിൻ ശംഖൊലി താരാപഥത്തിലും
മാറ്റൊലിക്കൊള്ളിക്കും വേദിയിതാ
നമ്മുടെ കേരളം നമ്മുടെ കേരളം
നന്മകൾ തൻ പൂങ്കാവനമാകും നാളെ

Song details

Film/album: ലളിതഗാനങ്ങൾ